領教壓點法叫苦連天
其實「壓點法」係國際普遍做法，唔少歐美國家警察對付示威者，採用最低武力時都會咁做。但由於「壓點法」真係好痛，被對付嘅人通常都會面容扭曲，如果警察用力過度，隨時對示威者造成傷害。所以監警會近期收到唔少投訴，指警方濫權使用「壓點法」。
可能連警方都覺得有必要解釋，所以上星期就邀請一眾監警會委員到警察總部扮示威者，然後警察會向佢哋使用「壓點法」，聽講警方以為咁做可以釋除監警會委員疑慮，但點知反而有反效果。據悉，雖然唔係個個監警會委員都被「抬走」，但聽聞試過「壓點法」嘅委員都叫苦連天。有委員仲話，事後有少少同情班示威者，因為真係估唔到咁痛喎。今次警方豈不是搵石頭揼自己腳？