政情：沙田區選 建制大廝殺
明年就到區議會選舉，早前我哋講過泛民黨派在沙田及荃灣揀位上各有分歧，但原來兩個建制政黨民建聯（民記）同經民聯，一樣喺沙田三個選區中互相「廝殺」，各有前因後果，睇嚟大戰一觸即發！睇番沙田區議會三十六個直選議席，第一大勢力就係同公民力量合併咗嘅新民黨，總共有十四個直選議員，民記就有八個，經民聯只有兩個議席，包括碧湖及錦英，但係民記就想落去搶位，莫非想趕盡殺絕？
冰芬誓撼偉倫
碧湖選區現任區議員劉偉倫由○三年起當選至今，以前係民主黨黨員，之後退黨成為獨立泛民，呢屆就轉投經民聯。民記上屆就派咗社區幹事黃冰芬對撼劉偉倫，只係輸一百三十幾票，據聞，近年有人游說黃冰芬轉去附近有補選嘅選區落腳，但係黃不為所動，堅持捲土重來爭奪碧湖選區議席，可能係想報一戰之仇。
EQ「圍魏救趙」
至於另一選區錦英，區議員湯寶珍亦係由○三年起當選至今，民記立法會議員葛珮帆（EQ）近期就搵咗個助理落區插旗，點解EQ要搶呢區？據聞係因為禾輋選區議員余倩雯係民記一員，經民聯今年初就派咗社區幹事李德華頻頻落區，仲喺社交網站開咗個專頁宣傳，搞咁多嘢擺到明想參選，EQ睇見梗係唔妥啦，所以要出到「圍魏救趙」呢招。經民聯立法會議員盧偉國做過沙田委任區議員，唔知佢有咩計謀拆招呢？
至於EQ本人都唔係冇受到挑戰，佢嘅頌安選區近期就有工黨張超雄開設辦事處，坐輪椅嘅助理葉榮就掛晒橫額，睇嚟係想挑戰EQ。不過，葉榮近期因為衝擊立法會被捕，可能有手尾跟，隨時影響選情。另一個焦點就係乙明選區，新民主同盟議員丘文俊就被新民黨、經民聯及工聯會齊開議辦「圍攻」，加上年底即將入伙嘅公屋水泉澳邨歸入乙明選區，相信又多一個變數。單睇上述幾個選區已鬥到七彩，相信稍後選情將更加精彩。