中環出更：鬧完佔中又撐場 肥佬黎「亂嚟」
「佔領中環」行動最快會在人大常委會做決定後嘅短時間內進行，泛民主派尋日搞咗個「民主登高日」，除咗多名泛民議員撐場外，卓妮仲見到多咗一名「不速之客」，就係批評佔中三子係「書生論政」嘅壹傳媒老闆肥佬黎，估唔到佢一邊鬧佔中，一邊又撐場，真係人格分裂！
肥佬黎今次係首次出席佔中公開活動，佢承認自己膝頭唔得，行唔到斜路，就坐車到山頂公園終點。問佢點睇自己「書生論政」言論，佢話去到緊張關頭，冇得書生，又話三子有三子嘅做法，「我自己嘅講法，你知我亂嚟、亂噏」，咁唔怪得佢早前對一則有關「黎志英」嘅訃聞廣告咁大反應嘞。
李漢奸都有現身
對於佢講過佔中「不幫唔掂」，肥佬黎就話未諗到點幫，反問卓妮「你同我諗吓，話畀我聽」。其實點幫又使乜教佢吖，佢咁鍾意捐錢，咁咪捐錢囉！呢，話口未完，肥佬黎就講到明會繼續向泛民捐錢，但就唔肯評論早前被揭發向多個泛民政黨人士捐款四千多萬元單醜聞嘞。
除咗肥佬黎，同為「搞事四人幫」嘅「李漢奸」民主黨創黨主席李柱銘都有現身，佢行到終點時仲搵埋幾名民主黨議員同肥佬黎影相，真係老友到極。另外，真普選聯盟召集人鄭宇碩可能少行山，行到梅道就頭暈，要送去瑪麗醫院檢查，同日出院。
卓妮