中環出更：挑選靚拐杖楊官重貴氣
咪以為只得衫褲鞋襪嘅款式先至可以千變萬化，原來連長者使用的拐杖（Walking Sticks）都一樣可以花款多多，咁啱早前卓妮就喺中環置地廣場見到前首席大法官「楊官」楊鐵樑在一間店舖內挑選拐杖。卓妮留意到平日間中都會攜帶拐杖外出嘅楊官，每隔兩三年，手上拐杖嘅款式都會轉一轉，款式仲愈來愈靚同高貴，唔通拐杖都要講潮流嘅？
當日下午約兩點鐘，楊官身穿杏色西裝，喺一位男士攙扶及一位女士陪同下，去到置地廣場一間男士服裝店The Armoury。見佢哋對放喺近店內門口附近一個英國品牌嘅雨傘Fox Umbrellas好有興趣，店員仲好快手拿出小冊子展示更多款式介紹畀佢哋添，不過楊官似乎想買拐杖多啲。
「鎳」鑄造勝在夠耐用
話說呢個品牌嘅雨傘及拐杖好出名，其動物雕刻手柄仲係用一種叫「鎳」（Nickle）嘅銀白色金屬鑄造，耐用又唔會氧化，除咗有好多皇室貴族及名流愛用之外，在六十年代英國電視劇《復仇者》中，仲因為主角經常手持一把而廣為識貨之人追捧。
楊官平日唔單止行路腰骨挺直，衣着亦散發紳士風範，對拐杖款式講究自然非常合理。由七、八年前，佢手上類似皮革嘅黑色手柄拐杖，到後來嘅木柄及早前嘅鎳柄，每隔兩三年，就會見到佢手持一支新拐杖現身。計計吓，又差唔多係時候換一支新喇！不過，當日楊官冇買到就離開。
聽店員講，原來呢個品牌嘅師傅會在本月底來港為客人度身訂造拐杖，只要預約時間，就可以自由配搭手柄同杖身，配搭出啱晒自己心水及長度嘅拐杖，唔知楊官係咪都買厭咗製成品，諗住月底再去自行配搭一支新拐杖呢？
卓妮