工欲善其事，必先利其器，呢個道理三歲細路都識，唯獨港產官僚唔明。呢，好似羅湖管制站咁吖，部分設施竟然係二十年前嘅老爺貨，問你服未！
係人都知，近年中港交往愈趨頻繁，淨係羅湖管制站，每日就有廿三萬人次往返。人流多咗，當局照計應該相應增加人手同改善設施至係o架，可惜事實啱啱相反，羅湖過關通道依家仲沿用緊二十年前嘅設計，又短又落後。海關官員承認，呢個設計「先天不足」，關員只有八秒時間留意可疑人士，高峰期一個人更要應付三十名過關客。你知啦，旅客逼晒喺咁短嘅通道，人頭湧湧，直頭好似「千軍萬馬過獨木橋」咁墟冚，執法人員就算金睛火眼，一眼關七，都難免掛一漏萬啦。
唔係功夫茶杞人憂天o架。海關數字顯示，今年頭八個月喺羅湖口岸檢獲約十八公斤毒品，較舊年同期急增近兩倍，淨係過去三星期已經檢獲八點二公斤，拘捕五男二女，最細只有十四歲添。好明顯，不法分子可能就係睇到呢個漏洞，咪博大霧企圖蒙混過關囉。
冰凍三尺，非一日之寒，中港交流頻繁，人流愈來愈多，海關人員查不勝查，已經唔係今時今日嘅事咯。有人曾經測試過，手持兩個共裝有十五支煙嘅煙盒行經過關通道，居然可以大搖大擺，完全冇人理。有經常過境嘅煙民甚至「分享心得」，認為海關一百次都查唔到兩、三次，唔怪得攜帶超額香煙嘅人愈來愈多啦。
講開又講，海關應付旅客人潮左支右絀、甩甩漏漏，其實只係港府胡混度日、敷衍塞責嘅一個縮影啫。個人遊開放超過十年，內地訪港旅客不斷增加，由最初幾百萬增加到舊年超過四千萬人次，可惜港府淨係識得坐享其成，從來冇諗過點樣改善及增加旅遊設施，搞到七國咁亂，無論係景點，定係酒店，統統逼爆。正所謂，冇咁大個頭唔好戴咁大頂帽，香港接待旅客能力長期超負荷，有咩法子唔引起中港矛盾吖！
正如古人話齋︰築室道謀，三年無成。港府宏圖大計唔少，可惜眼高手低，講多過做，邊境購物城、大嶼山發展計劃停留於紙上談兵，幾時至可落實，只有天曉得。咪話功夫茶唔提醒，此地不留人，自有留人處，香港旅遊業一味食老本，加上驅蝗、拖篋鬧劇不斷，愈嚟愈多內地旅客過門不入，零售總額錄得五連跌就係警號嘞。海關設施二十年如一日，正正係港產官僚不思進取嘅最佳例證，香港由呢班廢官管治，你話有乜可能唔沉淪吖！