泛民主派立法會議員上星期聯署，話要決志追求真普選，如果政府提出嘅方案唔符合國際標準，就會予以否決。雖然有建制派批評泛民係綑綁立場，但有更多人質疑，聯署竟然側側膊冇提到公民提名。佔領中環公投方案明明包含公民提名，之前佢哋又不斷大聲疾呼要有公民提名，點解依家當冇咗件事呢？講到底其實係泛民全部褪軚，只係冇人肯認啫，唔通公民提名已變成當年公屋「八萬五」目標咁，唔提就代表唔存在？抑或一早就冇咗？泛民飯盒會召集人馮檢基真係要公開解釋吓嘞！
