政情：商界搞招聘會助釋囚
為協助釋囚重投社會，商界助更生委員會執行主席何偉權（Ken）近日籌備緊釋囚招聘日。由於各行各業均出現人手荒，所以反應好熱烈，至今籌集嘅職位空缺多達六百五十個，薪酬由九千至五萬元不等。招聘會將於九月尾舉行，讓僱主透過視像會議進行面試。
其中建築、飲食及零售業僱主反應最好，建築業承建商聯會副會長郭棟強就提供六十個空缺職位。佢慨嘆建造業人手嚴重短缺，只要更生人士肯搏，僱主唔會介意佢嘅過去。今次招工條件頗優厚，例如地盤雜工月薪一萬五千元，紮鐵或釘裝石屎板工人月薪可達四、五萬元。佢話釋囚都有出頭天，曾經有人發奮終成為判頭。
中華廠商聯合會餐飲及服務業行業委員會主席符策雄亦幫手籌集一百五十份工，佢提供面試錦囊話，更生人士要放低包袱、積極，唔好畏縮，希望佢哋把握機會重投職場，揭開人生新一頁。