政情：鄭承隆為榴槤忙返仁濟

仁濟醫院前主席鄭承隆（Edwin）已經卸任年幾，但前日佢突然煞有介事咁趕返醫院董事局，唔少昔日同事都等緊佢埋位，枱面仲放咗把開信刀添，以為有乜大鑊嘢啦，原來只係為咗開榴槤。Edwin向我哋解畫，話近幾年都會託果欄老友帶幾箱「貓山王」榴槤去醫院慰勞班同事，後來慢慢成為仁濟嘅獨特「習俗」，單係前日佢就開咗三箱共十六個「貓山王」！開得多自然工多藝熟，Edwin笑言依家用開信刀，閒閒哋十分鐘都開到十五個「貓山王」，佢仲特別將「戰績」上載社交網站，吸引唔少老友留言要求開心分享添！