政情：荔枝園翻身 梁福元搵番夠本

喺新界打滾多年嘅梁福元絕非省油嘅燈，事過境遷後發揮「小強」打不死精神，除咗將山莊易名大棠有機生態園，打正旗號做有機生態旅遊外，最近仲將全球四大雪節之一嘅哈爾濱冰雪節引入大棠，再乘每年遊人賞紅葉熱潮，喺山莊種埋私伙紅葉、櫻花，一年四季想睇咩花都有，真係搵水一條龍。

指政府推動盛事慢半拍

荔枝園營運多年，都係騎吓馬、摘吓士多啤梨咁，梁福元眼見如果事事由政府推動肯定慢半拍，好似盛事基金多年來資助幾多盛事有辦你睇，所以佢索性親自操刀，喺自己個荔枝園主辦港版哈爾濱冰雪節，打造佔地約兩個半足球場咁大嘅嘉年華會。除咗大型戶外冰雪館，場內仲會展出逾百件冰雕展品，成為全港最大嘅室內冰雪館，料十月初正式開幕。不過，香港咁熱嘅天氣搞冰雪館，用電量一定驚人，唔知佢點圍皮呢？

一條龍服務 擴車路接待

據知梁福元更睇中近年大棠每逢秋冬季漫山紅葉，賞紅葉潮熱爆全港，認為市民與其花成個鐘上山睇嗰幾棵楓樹，不如喺佢個荔枝園種埋一份，配合冰雪節推廣一條龍康樂服務。據講山莊連日本傳統櫻花都種埋，時機成熟連櫻花都有得睇，到時真係去元朗就咩都有得睇，唔使恨去日本、加拿大，或者可以考慮改名做「大棠荔園」都得喎！不過，以前荔園有頭大象坐鎮，唔知梁福元會搵咩嚟鎮住個荔枝園呢？

據了解，荔枝園為接待逾百萬人次旅客，梁福元特別加闊車路，方便個人遊同本地旅客坐車入園；而冰雪節結束後，場地仍然可以舉辦其他節目，似乎想打造「新界維園」，唔使出港島同人爭，好符合新界人性格喎！