中環出更：父子兵瑞士行山 健波先買成篋衫
暑假係旅遊高峰期，天氣比較涼嘅地方最受歡迎，有得玩又可以避暑。立法會保險界議員陳健波都趁休會期間同家人外遊，早前卓妮途經銅鑼灣時，就巧遇健波同太太好閒情逸致咁喺時代廣場拍拖行街，仲入咗一間運動服裝店舖睇行山用品。二人一揀就揀咗成個鐘頭，入去時兩手空空，出來時竟然拖住成個篋，認真誇張！
當日下午三點幾鐘，我哋見健波兩公婆一入間店舖，就已經睇啱咗一對行山鞋，仲即刻坐低試一試，可惜健波想要嘅橙色似乎冇晒貨，但經店員介紹下，好快佢就揀啱另一對黑黃色嘅鞋嘞。之後佢又特登揀咗幾對厚襪，吸汗之餘仲可以減輕行山時腳部皮膚嘅摩擦！揀完鞋襪仲未夠，見佢同太太拎起啲衫左拼右拼，對樣樣嘢都好有興趣，之後仲入埋試身室試咗一輪，最後拖住成個篋出來，仲即時做埋間店舖嘅VIP添。
平日女士們試衫男士等候就見得多，今次就輪到健波試衫，佢太太邊等邊同售貨員傾偈。健波話，佢今個月會同囝囝去瑞士聖莫里茲行山，嗰邊溫度較低，有時得五至六度，所以要買定一堆禦寒登山衣物過去。
老婆怕辛苦唔去
不過，陳太就話怕辛苦唔去住，等老公同囝囝探次路睇吓咩情況先，所以當日只係去幫眼揀衫褲。
健波仲開玩笑話，呢個係一個同囝囝獨處嘅好時機，因為平日冇乜機會同個仔講做人道理，一齊去旅行就可以趁個仔行緊山冇得走，焗佢一齊傾吓將來、工作或識女朋友嘅情況。如果係咁，呢個親子機會都唔平喎！
卓妮