天下本無事，庸官自擾之。平機會尋日舉行首場歧視條例檢討公眾諮詢，結果演變成對主席周一嶽嘅聲討大會，呢啲咪叫陸雲亭睇相，唔衰攞嚟衰囉！
話說平機會最近展開為期三個月嘅歧視條例檢討公眾諮詢，收集保障性小眾、同居及內地人免受歧視等修例範圍意見。唔少學者早就警告，相關議題一個比一個惹火，處理稍有不慎，分分鐘激化矛盾，弄巧反拙。可惜吖，言者諄諄，聽者藐藐，平機會一意孤行，果然出事喇。喺尋日嘅諮詢會上，有組織踩場，質疑平機會帶頭歧視香港人，怒轟周一鑊冇嘢搵嘢嚟做；亦有團體批評平機會僭建法例，建議將「事實婚姻」納入歧視條例，不限同性或異性，擔心傳統家庭價值受衝擊；有市民甚至要求周一鑊落台添。成個諮詢會劍拔弩張，火花四濺，十足打仗咁，簡直七國咁亂。
唉，自己知自己事，好心周一鑊唔好再出來獻世喇。家陣香港爭拗多多，分化嚴重，淨係佔中同反佔中已經搞到社會撕裂，佢仲要添煩添亂，簡直不知所謂。再講吖，香港經濟民生問題一大籮，大把正經嘢有待解決，佢偏偏喺呢個時候無事生非，市民認真多得佢唔少。
可能有人會問，周一鑊出名渾渾噩噩，敷衍塞責，因乜解究忽然積極，主動出擊呢？嗱，咪以為大懶蟲轉死性呀，實情係周一鑊官迷心竅，為求連任平機會主席而無所不用其極，佢近排四圍點火頭，無非想喺任期屆滿時以工作未完成為藉口，繼續賴死唔走咋。成件事有迹可尋，佢舊年啱啱上任，櫈都未坐暖啫，就積極擴權，攤大手板問立法會要人要錢，慌唔係不甘寂寞，想出風頭咩。
話時話，歧視條例千瘡百孔，的確好多地方需要檢討，例如近年經常有人透過殘疾歧視條例濫告無辜，即使被告勝訴，亦要付上大筆訟費，唔單止浪費公帑，更加對守法公民造成極大困擾。奇怪嘅係，對於咁大嘅漏洞，周一鑊居然視而不見，應做嘅唔做，唔應做嘅亂做，講得好聽啲係不務正業，講得唔好聽直頭係存心靠害！
古人就講得啱嘞，禍福無門，惟人自招。周一鑊執掌食衞局八年，禍港八年，早已有口皆悲，港府偏偏對呢塊政治爛電池情有獨鍾，翻閹佢執掌平機會，唔出事至奇喇。正所謂，多隻香爐多隻鬼，平機會呢類政治花瓶醜聞多多，添煩添亂，早就應該摺埋，慳番啲公帑好過喇！