政情：田二少睇唔過眼 倡讓座立法

立法會議員田北辰（田二少）最近抱龍鳳孫過足外公癮，唔知係咪因為咁，佢對公共交通工具上冇人讓座畀孕婦、長者特別嫉惡如仇。尋日有網民將二少建議立法規定乘客讓座嘅街頭橫額上載到社交網站，隨即惹來大批網民「聲討」，批評一旦立法，法例要求「低頭族」幾多秒內要讓座呢？點樣決定讓座嘅先後次序呢？有網民仲揶揄二少平日有司機接送，要佢嘅座駕「讓座」接載有需要嘅人又得唔得？不過，二少向我哋澄清，只係建議立法規管關愛座要優先畀有需要人士坐，長遠更應設立發牌制度，有需要嘅市民只要獲發牌就可以優先坐關愛座咁解。