政情：黃之鋒累兩大學收「恐嚇信」
大學聯招前日放榜，成績備受關注嘅學民思潮召集人黃之鋒自爆已獲大學取錄，但就拒絕透露係邊一間。不過，部分「有心人」早前唔知係咪收錯風，以為之鋒入硬香港大學、中文大學，先後向兩間大學寄出「恐嚇信」，抬頭寫明係畀黃之鋒，威脅佢唔好再搞咁多嘢，可憐兩大學生會代收信件虛驚一場。
黃被鬧「臭罌出臭草」
我哋向中大學生會取得呢封比較似係家書嘅「恐嚇信」，署名「人民」劈頭第一句就鬧之鋒「臭罌出臭草」，受陰招洗腦、銀彈引誘，破壞「立法局」云云，仲苦口婆心勸之鋒「不要學你前輩陳日君、陳方安生、李柱銘」，要「放下屠刀，做個真正好市民」喎！唔講仲以為之鋒學咗民主阿婆同李漢奸咁去歐美「唱衰香港」。
據中大學生會成員透露，佢哋不時收到唔同類型嘅恐嚇信，幾乎每月幾封，大致都係恐嚇佢哋咪再「搞搞陣」，所以佢哋唔會驚，反而係收到寄畀之鋒嘅「家書」比較出奇。睇嚟寄件人要再打聽吓之鋒讀邊間大學喇！