中環出更：發叔：地政官員要識避嫌
新界鄉議局主席劉皇發喺新界有好多土地，但卓妮尋日同佢講到地政總署助理署長林嘉芬同丈夫買農地再申請擴大土地建屋比事件，涉及利益衝突，連佢都話林嘉芬有問題。發叔話，林話晒都係政府官員，始終都要避嫌，好多時如果官員牽涉土地問題，被調離負責相關土地範圍嘅職務都係好正常。不過，發叔就話未知林嘉芬買邊幅地，要睇吓資料先喎。
曾憲強：佢係普通人就冇問題
卓妮再追查之下，發現原來林嘉芬同丈夫買入嘅土地位處八鄉範圍，咁八鄉鄉事委員會主席曾憲強又點睇呢？曾憲強話，其實林嘉芬按照既定程序申請擴大建屋比亦有作出申報，所以唔涉及隱瞞，如果佢係普通人，成件事就冇問題，只係佢嘅身份比較敏感，但講到件事係咪涉嫌官官相衞，咁就真係唔知喇。
其實發叔同曾憲強都唔係太想講林嘉芬單嘢，又話同林嘉芬唔係太熟，所以不作太多評論喎。咁究竟林嘉芬嘅為人係點呢？有地區人士透露，林嘉芬原來喺新界區得罪唔少人，所以佢呢次買農地事件令好多人都睇唔過眼。其實講到尾，為人係點都係另一回事，但身為政府官員，政治智慧同政治敏感度始終要比其他人高囉！
卓妮