中環出更：專資會豪華遊 一路向「西」
踏足世界最長的西伯利亞鐵路，係唔少旅行家的夢想。香港專業及資深行政人員協會一眾成員早前就組隊踏上征途，身兼理事的工業總會榮譽主席鍾志平與新華旅遊董事總經理楊章桂芝（Cindy）齊帶隊，登上世界八大列車之一嘅「金鷹號」向西探索。列車內籠豪華，魚子醬源源不絕奉上，可惜有晚火車「甩轆」唔夠供水，令佢哋一度無水沖涼。
遊西伯利亞十一日，團費高達十多萬元，常務副會長黃偉雄、廠商會副會長顏吳餘英夫婦及「多士爐大王」葉傑全夫婦等，齊加入豪華專列。團友先飛抵蒙古烏蘭巴托，欣賞外蒙風光，再途經有西伯利亞明珠之稱嘅貝加爾湖、新西伯利亞，然後到訪歷史名城喀山、克里姆林宮等。
團費十幾萬 曾無水沖涼
全長達九千公里嘅西伯利亞鐵路，坐火車都會坐到悶，但近期空難頻頻，團友都話坐火車安心啲。雖然「金鷹號」豪華，但水缸容量有限，話說有晚團友沖涼時大開水喉，翌日發現一滴水都無，狼狽到極，職員收到風後馬上加水補救。
行程另一好玩之處，係試坐古蒸氣火車頭欣賞湖光山色，點知列車一駛入山洞，全團人即時黑面。Cindy笑言係火車噴出嘅煤塵作怪，熏到大家面黑黑。西伯利亞天氣出奇地好，團友喺戶外少不免擔遮防曬，點知有位五歲小童好奇地追問究竟，赫然醒覺俄國人少見陽光，恨不得曬餐飽。俄國除咗盛產金髮美女，仲有馳名魚子醬，但每人限買一罐，團友於是掃得幾多得幾多。
卓妮