好多人批評香港旅遊設施老化，景點又少又無新意，其實世事無絕對，香港有好多另類景點有待發掘。好似劏房咁吖，早就遍地開花，家陣連商場通道同閣樓都劏埋一份，旅客睇到呢一幕幕香港獨有嘅奇景，肯定嘆為觀止！
係咁嘅，有讀者向本報投訴，早前以七千蚊月租租用粉嶺一個商場舖位，準備開間烘焙教室，自己創一番事業，點知開張後發現商場無消防設施同逃生通道，向屋宇署查詢至知，原來個舖位係由一間地舖嘅閣樓劏出嚟，而署方更早喺舊年年底已接獲多次投訴，證實屬於僭建。咁就奇喇，既然屬於僭建，點解當局唔執法呢？咁豈不是靠害？最慘係呢位讀者騎虎難下，繼續經營怕將來出事要上身，如果半途而廢咯喎，之前投資嘅十幾萬化為烏有不特止，分分鐘仲要賠償餘下租金，都咪話唔閉翳。
咪以為呢個只係個別例子，查實劏房舖位早就見怪不怪咯。嗱，除咗上述個案外，屯門一個商場更加連天井都唔放過，求其搭個簷篷就放租出去，問你服未。點解劏房舖位大行其道？之唔係屋宇署執法不力囉。好似屯門呢單個案咁吖，屋宇署以僭建物屬於「非優先取締類別」為由，淨係釘契就算，根本無阻業主繼續收租。正如立法會議員話齋，屋宇署長期唔執法，業主即使收到清拆令都當睇唔到喇！
即係咁，商場僭建出租牟利，租戶損失事小，好多僭建物位處逃生通道，發生火警時逃生無門，隨時搞出人命，唔係講玩！大家應該仲記得，幾年前旺角花園街四級大火，造成九死三十四傷，咪就係劏房惹禍囉。唔該屋宇署吸取教訓，加強巡查同執法，否則等到悲劇重演，呢隻鑊你哋孭唔起o架！
可惜吖，官僚靠得住，豬乸會上樹，旨意屋宇署加強巡查及執法，盞嘥氣嘅咋。家陣全港最少有六萬六千幾間劏房，如果計埋其他各式僭建物，相信有幾十萬咁多。面對咁嘅亂象，屋宇署嘅清拆進度又係點呢？答案係慢過烏龜囉。近幾年關於僭建嘅投訴愈嚟愈多，但署方無論清拆令以至落實清拆嘅數字都不增反減。更加攞命嘅係，屋宇署長期人手不足，巡查樓宇如走馬看花，甚至有業界人士踢爆，好多時都只係目測為主，旨意佢哋清查安全隱患，蚊都瞓蛇都死喇。
講到呢度，唔知大家有冇發現香港嘅都市炸彈愈嚟愈多，市民搭升降機怕急墜，行街怕冧樹冧招牌，依家連行商場都要提心吊膽，都咪話唔悲哀。計功夫茶話齋，有啲僭建物或者真係屬於「非優先取締類別」，但係港產官僚碌碌無為，搞到香港由福地變危城，就肯定要立即取締，吓話！