泛民主派立法會議員收取壹傳媒老闆肥佬黎政治獻金醜聞一事愈揭愈臭。公民黨毛孟靜（阿毛）尋日召開記者會，被問到知唔知該黨畀佢嘅五十四萬從何而來，阿毛就聲稱當時選舉太忙，無時間去過問捐款來源，但就「此地無銀」咁交出兩張銀行紀錄副本，話老公喺立法會選舉期間捐畀佢嘅五十萬係買賣黃金外匯所賺取，證明老公絕對無代取肥佬黎嘅捐款。咁就奇喇，點解佢唔直接交出該黨入錢畀佢嘅銀行紀錄呢？咁樣搞法唔單止冇法釋除公眾質疑，而且仲愈描愈黑添！
