政情：有相為證：針手醫腳痛 鄭承隆驚青

仁濟醫院前主席鄭承隆（Edwin）早前跣親扭傷隻左腳，出入要用拐杖借力，原來咁耐仲未好番。前日Edwin喺社交網站上載兩張相，其中一張見佢睩大對眼，表情好驚青咁望住左手，仲留言話：「腳痛咩事要針隻手先？」細心一睇，Edwin左手拇指兩側各插住一支針。另外一張相係左腳燒緊艾草及照燈，原來佢搵仁濟中醫痛症中心嘅醫師醫治左腳舊患。因乜事隻腳搞咁耐都醫唔好呢？佢就話近日為咗幫深井街坊解決街邊狗隻糞便惡臭問題，只係行咗十五分鐘就就頂不住嘞，咪要中醫急救囉！