大學聯招（JUPAS）尋日放榜，學民思潮唔少成員都係應屆考生，其中召集人黃之鋒及發言人周庭，喺上次中學文憑試放榜時，已經要搞記招交代成績。可能佢哋知道好多傳媒有意追訪，今次就分別喺自己及學民思潮嘅社交網站上公布去向。
黃之鋒尋日朝早話，佢有JUPAS嘅大學收，但因為仲等緊文憑試上訴結果，所以暫時唔公布邊間大學嘅學系收咗佢，多謝各位關心咁話喎。上訴結果下星期二就會公布，最快隔多三日就會知道佢「花落誰家」。
至於周庭就獲浸會大學社會科學院取錄，佢接受查詢時話，呢個係第二志願，第一志願係中文大學英文系，兩樣係都佢想讀，所以排中大第一博吓，第二就穩穩陣陣揀浸大。佢又透露，有學民思潮女義工文憑試成績唔錯，最終入咗浸大傳理系添！至於另一發言人劉貳龍都係應屆文憑試生，但佢至截稿前未有回覆。