政情：小圈子傾佔中 阿人想做共主？

唔方便為由 拒絕兩政團

大舊引述阿人指會議唔會有任何決定，但佢認為佔中咁大件事，應邀請所有表明會佔中嘅政團參與討論，人力反而要從第三渠道先獲悉有會開，擔心人力連討論嘅機會都冇，最終會被「賣豬仔」，又質疑阿人點解可以預先知道開會冇決定，「咁開嚟做咩？」據講今次會議連邊個牽頭都各說各話，有人話係真普聯牽頭，唔關阿人事，但如果唔係阿人牽頭，咁阿人又有咩資格拒絕人力同社民連參與呢？

其實大舊有隱憂不無道理，據知尋日會議齊集身兼真普聯成員嘅公民黨余若薇同梁家傑，已退出真普聯嘅民主黨何俊仁都有份，阿人以唔方便為由拒絕同屬真普聯嘅人力同社民連，認真講唔過去。難怪網民紛紛留言撐人力，鬧爆阿人想做佔中「獨家代理」、「又想好似將肥佬黎啲捐款袋住先，然後私有化」，甚至質疑阿人想搞分化統戰喎。

據了解，會議主要傾吓人大常委會月底就政改框架一錘定音前，面對「反佔中」輿論攻勢同肥佬黎黑金醜聞，泛民政團佔中前有咩可以做。

與會者稱冇商行動時間表

有與會代表向人力大派「定心丸」，話今次會面只係着團體返去開吓「腦震盪」會議，完全冇討論過佔中時間表，仲話如果佔中一定預埋人力，反諷早前七一預演佔中，人力啲議員唔知去晒邊喎。不過，阿人就肥佬黎捐款「袋住先」已袋出禍，依家又搞小圈子商討佔中，話佢唔係密謀攪局都冇人信啦！