中環出更：叫拆政總圍欄 泛民食檸檬
行政署上月中突然關閉政府總部東翼廣場，宣布因為保安理由而要喺廣場周邊加設三米高圍欄，被質疑有意打壓示威自由。雖然泛民主派即日已經鬧爆政府企圖用高牆隔絕民意，但佢哋延至尋日先約見行政署署長蔡潔如表達不滿，又叫行政署拆走起好一半嘅圍欄，結果無功而還不特止，仲被人噴到一臉屁。
議員涂謹申會後引述蔡潔如話，政總外加建圍欄係政府內部嘅集體決定，又話政總廣場一向唔容許市民示威，只係以前政府中人「隻眼開隻眼閉」，唔會亂咁趕走啲示威者，依家咁做係要「撥亂反正」。蔡潔如之後又以商業處所為例，話商業處所嘅管理層都有權管理自己嘅地方，覺得政總保安屬於政府內部事務，事前唔需要諮詢公眾喎。
聽到蔡潔如咁講，泛民議員即時大動肝火，七嘴八舌咁鬧爆行政署鬼鬼祟祟起圍欄，企圖收緊市民和平請願嘅自由。喺呢個時候，蔡潔如木無表情咁拋下一句：「咁你哋有啲咩更好嘅建議呢？」泛民議員即時提出要求行政署拆走就嚟起完嘅圍欄，蔡潔如都無佢哋咁好氣，即場拒絕佢哋，維持原判繼續進行工程。
卓妮