中環出更：登台演戲 金刀梁做番自己
老人家除咗飲早茶同打麻雀外，仲可以有好多興趣。早前香港長者協會及馬鞍山靈糧小學合作舉辦慈善英文音樂劇，請埋長者學苑發展基金主席「金刀梁」梁智鴻客串粉墨登場，同資深演員林小湛拍住飾演祖父母角色。今次係金刀梁首次登台，林小湛大讚佢表現好自然，一啲都唔怯場。金刀梁就話只係做番自己，所以連劇本都唔使點背，即場爆肚咪夠晒自然囉！
呢套話劇係由馬鞍山靈糧小學靚女校長陳美娟一手一腳包辦，佢由劇本、背景音樂以至舞台布置都有參與。陳美娟話，音樂劇主要以英文為主，其中金刀梁有份演出嘅部分就以中文演繹，方便長者聽得明，先至可以一齊欣賞咁話。
飾演祖父 當平日傾偈
當日臨開場前，金刀梁提早一個鐘到達，佢笑笑口話，因為事前冇特別練過戲，所以專登早啲去綵排。佢話已經有兩個孫仔，今次叫佢扮阿爺，簡直係一啲難度都冇，因為根本就係做番自己，當正平時同啲孫傾偈就得喎！
同場仲有保良局前總理張智彥（Human）一家，佢嘅四歲囝囝Adrian唔單止有表演，仲身兼帶領嘉賓上台嘅重任。Human話，囝囝平日有啲怕醜，所以特登畀囝囝參加多啲活動練吓膽。當日見佢身旁嘅太太Alice腹大便便，預產期就係呢幾日，可喜可賀。
香港長者協會主席麥漢楷就話，城中年輕父母通常需要上班，好多時託家中兩老幫忙照顧小朋友，但係當後生父母得閒帶小朋友去街玩時，又經常唔帶兩老一齊去，留低佢哋喺屋企，所以年輕人應多關心家中長者嘅感受。
卓妮