香港一向被視為安全城市，唔似得伊拉克戰亂不已，亦唔似得美國槍擊頻頻，所以，子彈橫飛嘅場面似乎離香港好遙遠。其實，如果你真係咁諗，你就錯晒嘞。
嗱，尋日何文田又發生一宗氣槍狙擊事件，一位年逾八旬嘅晨運老翁無端端成為活靶，胸口中咗一槍，而附近嘅路牌更加布滿彈孔添。事後警方帶走一名男子調查，並檢走兩把「長槍」。你話嘞，光天化日之下，有人居然用氣槍亂咁掃射，係咪好恐怖吖？好彩老翁福大命大，送院救治後總算大步檻過。
話時話，今次已經唔係第一次喇，近年香港接連發生氣槍狙擊案，經常有人中招，搞到人心惶惶。舊年之嘛，天水圍有位少女收工返屋企，行行吓被氣槍射中鎖骨，要送院開刀取出子彈。好明顯，呢啲氣槍殺傷力咁大，多數經過非法改裝，萬一唔好彩射中要害，隨時攞命都似。舊年試過有小巴被射爆車窗，如果射中車胎，分分鐘導致車禍。
冇錯，本港法例規定氣槍子彈嘅「動能」唔可以超過二焦耳，若改裝到二焦耳以上，即係等同非法藏械，屬於刑事罪行，最高可判監十四年。弊在法例漏洞多多，加上當局監管不力，執法不嚴，導致非法改裝氣槍氾濫成災。有專業人士根據多宗槍擊事件造成嘅傷害及破壞力估計，有關氣槍嘅威力隨時達五焦耳以上，證明相關法例形同虛設。
呢嗱，本報早前踢爆，唔少氣槍店為顧客非法改裝，令氣槍威力大增，有啲甚至同真槍冇乜分別，而網上亦有大量教改裝氣槍嘅短片，只要照辦煮碗，提升氣槍火力可以話完全冇難度。有知情人士爆料，近年玩家改裝氣槍，愈玩愈癲，而進口氣槍嘅仿真度亦愈來愈高，如果係熟客，氣槍店仲會教埋點樣改裝，氣槍火力要幾大，就有幾大。
所以話，紀綱一廢，何事不生，非法改裝氣槍之所以愈來愈普遍，皆因法例過於寬鬆，早就不合時宜。港府話就話嚴格管制真槍實彈，但對同樣具殺傷力嘅氣槍就隻眼開隻眼閉，有規管等於冇規管，簡直靠害。最離譜嘅係，除咗氣槍狙擊事件頻生，早前九龍灣啟晴邨有人甚至用真槍擊斃鄰居，警方仲喺疑犯屋企搜出兩把真槍添。其實，規管氣槍唔係咁難啫，只要取締高性能及可進行改裝嘅氣槍，另外將改槍列為刑事罪行，咁咪可以提高阻嚇性囉，問題係港產官僚肯唔肯做嘢。
咪話功夫茶唔提醒，今日香港已經夠亂嘅喇，如果當局再唔修改法例，加強規管氣槍，香港遲早好似電影話齋：「讓子彈飛」！