政情：亂插旗 新同盟范眾憎
下屆區議會選舉開始進入埋身肉搏階段，由立法會議員范國威領導嘅新民主同盟，有意衝出新界東走入新界西係政界嘅公開秘密，之不過聽聞新同盟喺泛民區選協調機制嘅基礎外，瘋狂喺荃灣區內屬於其他泛民黨派嘅勢力範圍「插旗」，無論係民主黨、工黨等都無一幸免，玩殘晒其他黨派嘅部署，泛民「鬼打鬼」再度升溫，更多明爭暗鬥一觸即發！
新同盟於一二年立法會選舉成功將范國威送入立法會，過去嘅地區樁腳集中晒喺新東，根據過去嘅成功模式，據聞新同盟有意進一步開拓新西，首先邀請環保觸覺譚凱邦加盟，之後睇準荃灣區議會綠楊選區議員林發耿早前捲入桃色醜聞，心思思諗住派出年輕女將喺區內大打「溫情牌」，撼低林發耿呢個地頭蟲。
不過同一時間，據聞泛民兩大政黨民主黨（白鴿黨）同公民黨，一早傾好想派上屆敗走愉景選區嘅白鴿黨王銳德「過檔」出戰綠楊選區，至於愉景選區就由工黨地區人士趙恩來頂上挑戰「雙料議員」田北辰，當時已有預言如果新同盟嘅布局成真，王銳德可能成為犧牲品無位「落腳」。
傳係譚凱邦主意
新同盟同白鴿黨嘅短兵相接，點只限於荃灣區個別選區，聞說新同盟以白鴿黨唔派人參選象石同石圍角兩個選區為由，一度連「空降」人選都諗定，即時激到唔少民主黨中人紮紮跳，有傳新同盟呢個「插旗」安排係譚凱邦嘅主意，旨在增加區內知名度同培養地區樁腳，為一六年可能出戰新西做好準備。
正所謂「冤家宜解不宜結」，消息指新同盟同白鴿黨就荃灣呢三個選區花落誰家，都各不相讓，加上原來雙方都睇中沙田區議會翠田選區，雙雙有意派人參選，因此將以上四個選區重新擺上枱協調後，最終各自取得兩個選區主導權。
新同盟方面，據知揀定荃灣綠楊同沙田翠田選區，白鴿黨就拎番荃灣象石同石圍角選區，至於白鴿黨王銳德很大可能要重返愉景選區，同田二少、趙恩來三人混戰。范國威接受查詢時承認新同盟有意派人出戰，唔評論有傳譚凱邦「插旗」安排。話時話，區選角力未正式上演已經如此引人入勝，未來嘅互相「插旗」，將令更多泛民內部矛盾浮面。