中環出更：郭琳廣輸形象 飯局「取經」改善
資深大律師翟紹唐（翟少）早前夠鐘卸任獨立監察警方處理投訴委員會（監警會）主席，政府隨即委任執業律師郭琳廣接任，之不過郭琳廣甫上任櫈都未坐暖就備受質疑，據聞郭琳廣都自知輸喺起跑線上，上任後積極諗計改善形象，希望喺最短時間內換取各方嘅支持同信任。
放下身段學嘢
對於郭琳廣質疑主要涉及兩方面，一方面針對佢曾任廣西省政協委員，擔心「染紅」監警會，另一方面針對佢打破由資深大律師做主席嘅慣例，據聞郭琳廣上任後不敢怠慢，不時邀約委員飯局「取經」，言談間更放下身段，透露自知形象唔及翟少正面，希望委員過兩招畀佢可以將勤補拙。
眾所周知，翟少出任主席期間左右兼聽，喺會內做到真正嘅「香港營」，但郭琳廣上任至今只係兩個月，要大家一時接受新主席作風唔容易，加上依家正值警民關係嘅「冰河時期」，既然接任主席時間無得揀，自我檢視後重新出發，似乎係唯一出路嘞！
卓妮