中環出更：政商名人分享樂事
音樂可以陶冶性情，唔少政商界人士都玩得一手好樂器，其中喺西洋樂器中佔一席地位嘅色士風，尤其受男士歡迎。尋日銅鑼灣一間專門教授色士風嘅音樂學院開幕，立法會議員陳克勤、教育局政治助理施俊輝（Jeff）同大家樂集團主席陳裕光等政商界人士齊現身，眾人講起細個時學樂器嘅往事，趣事一籮筐。
陳克勤立會練色士風
克勤話，兩年前佢開始跟學院創辦人張志仁學吹色士風，不過佢只係學咗大半年就中斷咗，又因為太忙而無時間練歌，但佢總算學識吹《月亮代表我的心》、《新不了情》等懷舊歌曲，都算交出成績。佢仲自爆，早排一時技癢，拎個色士風喺立法會辦公室吹奏，但就被鄰居黃定光投訴吹得太難聽，嚇到佢自此都唔敢再喺立法會練習喎！不過克勤又唔使咁灰心，可能唔係佢吹得難聽呢？
唔少人細個時都有被父母迫學樂器嘅慘痛回憶，Jeff都係受害者之一。佢憶述讀幼稚園時，媽媽都有強迫佢學鋼琴，但自己唔係真心想學，所以冇耐就放棄。但係幾年後，Jeff突然又想學番鋼琴，於是決定重新來過，之後足足學咗七年添！除咗鋼琴，Jeff又試過學吹中國笛，由於唔使考試，毫無壓力，所以學得非常輕鬆，每次上堂都覺得好開心。
陳裕光入過校隊吹笛
現場有年輕學員即場表演色士風，聽得陳裕光如癡如醉。陳裕光話，細細個就已經好鍾意聽音樂，尤其喜愛聽交響樂同古典樂，佢讀小學時仲加入過學校嘅銀樂隊，負責吹銀笛，可惜學咗一陣之後就放棄。唔怪得最近佢舉辦一場音樂比賽，幫年輕人實現音樂夢喇！
卓妮