無事獻殷勤，非奸即盜，真係一啲都冇講錯，港府早排要求各決策局同部門由一六/一七年起，連續兩個財政年度，節省百分之一開支作為儲備，話呢啲錢上繳政府之後會進行「再分配」喎。嗱，咪以為大花筒政府忽然轉死性，錫住納稅人荷包，其實只係為卸責而鋪路o架咋！
唔係市民多疑o架，淨係睇吓港府公布時間就知道有蠱惑啦，唔早唔遲，偏偏揀喺立法會抖暑嘅時候搞突然襲擊，靜雞雞公布，直情係逃避監督。再講吖，港府明明坐擁七千億元巨額財政儲備，仲未計兩萬幾億嘅外匯儲備添，港府千缺萬缺淨係唔缺錢，有咩理由要求各部門勒緊肚皮呀？
醜婦終須見家翁，喺各方強烈質疑下，財政司司長曾俊華終於透過網誌解畫。佢話喎，政府過去幾年開支高速增長，長此落去將無以為繼，必須減速，否則會出現結構性財赤，強調咁做唔係「閂水喉」或者削減開支。哦，講咗大半日，兜咗個大圈，原來又係重施「狼來了」故技，製造巧婦難為無米炊嘅假象。
話時話，鬍鬚曾喊窮已經唔係咩新聞咯。佢老哥預算案年年估錯數，而且仲係錯到離晒大譜嗰隻。計功夫茶話齋，鬍鬚曾一係算術水皮過小學生，一係就想推卸政府長遠責任──家陣社會對實行全民退休保障嘅呼聲一浪高過一浪，政府咪以「莫財」為藉口，拖得就拖，賴得就賴囉。
正所謂政府靠得住，豬乸會上樹，港產官僚天生A字膊，市民早就唔奢望佢哋有腰骨，有膊頭o架嘞，怕只怕公帑應慳唔慳，應使唔使，到頭來受害嘅又係小市民。好簡單啫，有啲部門大花筒，有啲部門掹掹緊，家陣搞一刀切削支，好容易製造損不足以奉有餘嘅不公平現象。以社福界為例，自從實行一筆過撥款後，業界嗌晒救命，紛紛抱怨資源不足影響服務質素，家吓仲要削支，難怪有立法會議員擔心，將會令多項小眾社福服務「被開刀」啦。
所以話啫，政府削支唔係唔啱，但前提係要削得其所。係人都知，特區政府嘅「理財哲學」，從來都係善財難捨，冤枉甘心，第樣唔講，齋講大型基建項目，由於決策官員眼高手低，冇監冇管，工程超支如家常便飯，條數加埋閒閒地過千億，淨係呢一筆，莫講話慳百分之一，百分之二甚至百分之三，話都冇咁易喇。
不過講咁多都係嘥氣，鬍鬚曾做宅男寫網誌就叻啫，理財唔係佢嗰瓣嘅。反正都係削，不如乾脆削咗佢個位，等佢可以一邊歎咖啡，一邊專心做佢嘅鍵盤戰士，既人盡其才，又慳番公帑！