政情：飯盒會召集人 阿基好眷戀？
泛民主派各黨派組成嘅飯盒會今年九月會輪換召集人，民協馮檢基（阿基）將會功成身退，公民黨黨魁梁家傑將會接任，之不過阿基疑似好眷戀飯盒會召集人名銜，一方面猛話擔心唔做召集人就會曝光率大跌，另一方面又話自己嘅召集人任期仲有五個禮拜，遲啲先會就此進行總結。觀乎阿基嘅連串動作，似乎有意用盡召集人嘅政治影響力至最後一刻喎。
全國人大常委會本月底會就政改訂下框架，阿基形容到時政界可能會出現天翻地覆嘅轉變，相信身為召集人嘅佢到時仲有好多嘢要做。佢又透露，自己上周曾致電政務司司長林鄭月娥，查詢泛民同負責政改嘅中央官員會面嘅進展，對方表示依家仲未收到中央回覆，不過阿基仍然覺得雙方仲有會面機會，因為今年四月上海之行都係短時間內通知泛民並成行喎。