政情：八網難逃：探女遇雷雨葉劉延飛11小時

立法會放暑假，多名議員都趁機離港外遊充電或探望親友，不過前赴英國會合囡囡嘅新民黨主席葉劉淑儀，上周末喺香港起飛時，航班就因天氣而嚴重延誤，認真當黑。葉太喺社交網站表示，飛赴倫敦嘅航班因起飛前一晚遇到雷雨，被迫喺機場等了又等，佢最後決定先返屋企瞓覺，翌日再到機場，終於喺本月二日下午先飛抵英國，同日晚上七時先入到去倫敦，前後足足延誤咗十一小時。葉太又話，自己原定會早過囡囡葉榮欣（Cynthia）十小時抵達倫敦，可以先到酒店休息吓，惟因航班延誤關係，從克羅地亞出發嘅Cynthia，反而早咗佢四小時抵達，葉劉等人變被等。