政情：檢討旅客量 阿蘇拖拖拖…
中港矛盾一浪接一浪，繼搶床位、搶單位、搶學位同搶奶粉之後，最近連公眾游泳池都話因為有太多內地旅客到訪，搞到又污糟又逼人。還記得全國人大委員長張德江曾經喺今年三月初，高調指示港澳辦及國家旅遊局等中央部門，聯同特區政府調查香港嘅旅客容量問題，期間商務及經濟發展局局長蘇錦樑仲專程飛過上北京，向內地當局提出將「一簽多行」政策收緊為「一年最多五十二行」，但至今前後五個月都冇乜實質進展。有港府中人透露，限制內地旅客訪港問題，喺中港兩地都出現極大反彈，根本冇內地部門或官員肯認頭「做醜人」統籌做嘢，估計兩地政府都會採取「拖字訣」，短期內好難有突破性發展。
消息指出，限制內地旅客訪港問題至今只聞樓梯聲響，主因係港府喺內地可以話係「冇朋友」。一則個人遊同「一簽多行」政策，牽涉內地眾多部委同省市，理應負責擔當統籌角色嘅港澳辦，近日愈做愈hea，其中現任港澳辦主任王光亞，更曾經對香港單方面推出「限奶令」紓緩中港矛盾有微言，單靠港澳辦就旅客問題幫港府出頭，真係死得。
深圳勢反對
其次係國家旅遊局近年大力動推內地居民到外地旅遊，要佢哋出手減少開放個人遊城市數目，等於叫佢哋「倒自己米」。至於負責內地出入境管制嘅公安部，要佢哋收緊各類訪港簽證，工作繁複且吃力不討好，當然亦唔會好落力咁幫香港手。
不過，數到內地最大反彈嘅持份者，必然係同香港毗鄰嘅深圳市。消息指深圳內部山頭割據，絕非一言堂，例如早前港府話要擴建鄰近深圳嘅屯門堆填區，深圳方面三兩下手勢就發動到數千萬民眾簽名反對，要深圳市政府配合港府收緊「一簽多行」，等於變相禁止大批深圳居民經常到香港消費購物，隨即會引發上萬深圳居民包圍深圳市政府，想幫你香港都幾難！
工商界不滿
除咗內地方面無人願意牽頭變成「無頭公案」，香港方面亦係腹背受敵，進退維谷。早前特首梁振英拋出削減兩成個人遊旅客「試水溫」，隨即引起本港工商界強烈反彈，皆因單係因為內地大力反貪腐、反揮霍，已令香港嘅零售銷售額顯著下跌，唔少專做內地高消費旅客嘅店舖被迫結業，香港部分旺區市面開始零星出現吉舖。若果只係小修小補，例如盛傳嘅「一年最多五十二行」方案，班本土派人士亦肯定唔會收貨，繼續大搞「驅蝗」。蘇錦樑今次真係做又死，唔做又死，倒不如拖住先，等大家唔記得就唔存在好過。