中環出更：梁籌庭鬧財爺 「淨識做鍵盤戰士」
政府日前向各個政策局同部門首長發通告，話要喺二○一六年起分兩年節省百分之二部門開支，然後上繳政府再作分配。代表基層公務員嘅香港公務員工會聯合會總幹事梁籌庭，尋日就閙爆財政司司長曾俊華（鬍鬚曾），批評佢對於緊縮開支咁重要嘅政策，竟然完全冇問過公務員意見！
「公務員對削支好憂心」
梁籌庭指出，唔少公務員喺傳媒報道得知削支消息後都好憂心，擔心政府會為咗節省資源而做無良僱主，向公務員派大信封，或者用埋啲「陰招」，喺出現人手流失時又唔請人等。除咗鬧爆政府全無透明度，梁籌庭又炮轟鬍鬚曾淨係識做「鍵盤戰士」︰「佢根本就係唔肯同公務員對話，淨係識透過大氣電波、透過網誌發布訊息！」
另外，聯合會一直希望政府可以畀全體現職公務員，一次過自行選擇係咪延遲退休，但公務員事務局就堅持由部門首長加局方高層，決定係咪畀某啲同事延遲退休，並質疑部分願意喺正常退休年齡後繼續留低嘅公務員，佢哋嘅技能同表現未必符合部門要求喎。公務員工會聯合會主席曾森就反駁，如果有位公務員做咗幾十年都話未唔符合要求，咁佢哋平日返工做咩㗎？批評當局喺度「抹黑」公務員。
卓妮