中環出更:世界立立亂 名人外遊冇有怕

夏天係旅遊旺季,雖然近排接二連三發生空難事件、高雄氣爆意外等,但亦無阻一眾名人出外旅遊嘅計劃。日前世界跳繩錦標賽閉幕,唔少政商及體育界名人亦有出席,趁機一睹運動健兒嘅敏捷身手。其中香港青年聯會主席霍啟剛講起空難事件,就話外遊時會揀大航空公司同坐大機,所以唔太擔心,仲啱啱同家人去完歐洲出席舊同學婚禮返嚟,順道去埋英國同意大利玩添!

郭晶晶再懷孕 「只係傳聞」

伊波拉病毒咁得人驚,啱啱外遊完返港嘅霍啟剛就話都唔知點預防,不過佢相信港人衞生意識夠高,唔擔心喎!對於早幾個月有傳佢太太郭晶晶懷第二胎,佢就話只係傳聞,佢哋都想繼續生多個,不過聽聞兩個小朋友年紀太近,大嗰個會呷醋,所以要隔多幾年先,仲問卓妮有冇類似經驗添。為咗個仔,佢嘅考慮真係無微不至。不過佢諗兩諗,又話自己同細佬霍啟山相差四年,相處無問題,所以都係順其自然喎!

城大校董會主席胡曉明(Herman)睇跳繩睇得好入神,原來佢十五歲開始就係中學網球校隊,訓練時經常要跳繩,鍛鍊體能同彈跳力。而目前佢就係香港網球元老總會會長,仲不時打比賽,佢太太以前都好鍾意打網球o架,不過三年前在家發生意外,整傷咗胸骨,需要時間復原就冇再打喇。

同場仲有食物及衞生局局長高永文,原來高雄爆炸時,佢咁啱身在台中,爆炸後收到過百個朋友嘅慰問訊息,雖然高雄爆炸影響唔到佢,不過佢知道咁多朋友擔心佢,佢都好感動,佢又計劃同太太聽日去泰國玩幾日,不過最終去唔去得成,都要今晚先能確定。伊波拉病毒咁得人驚,高永文梗係要時刻留意住事態發展,如果殺到,佢當然行唔開啦。

卓妮

第一手消息請下載on.cc東網iPhone/iPad/Android/Windows Phone Apps