先問大家一個問題，做政客嘅首要條件係乜？冇錯嘞，就係面皮要夠厚，即使做咗虧心事被踢爆，都要死撐到底，絕對唔可以認衰o架。
嗱，工黨立法會議員李卓人咪就係當中嘅人辦囉。人老精，鬼老靈，呢位老牌政客短短兩年內收取淫賤黎一百五十萬元政治黑金，唔止冇向立法會申報，而且一直將款項存放喺自己嘅私人戶口，三歲細路仔都知道當中有蠱惑喇。點知佢仲喺度死撐，聲稱有關捐款係代工黨收取，包括八個月前收取嘅五十萬元，曾計劃用來成立環保社企，惟因社企至今未開戶，款項先至由佢保管；佢仲話咁做不涉個人利益，毋須申報喎。你話嘞，佢嘅面皮夠唔夠厚吖？
正所謂，信佢一成，雙目失明。李卓人講到自己咁光明正大，點解要以個人名義收取黑金？點解唔早啲將錢轉入工黨戶口？點解要等到醜聞被踢爆先至補鑊？唔通佢連利息都想食埋？
群眾眼睛係雪亮嘅，政客愈係死撐，愈顯得心中有鬼。正如有人話齋，淫賤黎唔係開善堂嘅，唔會無端端畀錢泛民政客，就算要做善事，都捐畀窮人先喇。淫賤傳媒同政客狼狽為奸，一個畀錢，一個收錢，講得好聽係推動民主，其實根本係唔見得光嘅政治交易，如果唔係，使乜鬼鬼祟祟，當中都唔知有冇涉及洗黑錢添吖。
不可不知，根據立法會嘅《議事規則》，任何議員如不遵從規則，冇登記個人利益、披露個人金錢利益等，最嚴重嘅可被暫停職務。李卓人仲死撐話收取淫賤黎巨額黑金不涉個人利益，毋須申報，簡直厚顏無恥，侮辱港人智慧！
講到無恥咯喎，有「民主阿婆」之稱嘅陳方安生亦不遑多讓o架。佢身為前政府高官，一邊領取長俸，接受納稅人供養，一邊收取淫賤黎嘅巨額黑金，替壹淫媒乞廣告，明顯涉及延後利益，但佢唔淨止拒絕交代詳情，反而指相關報道係「白色恐怖」，畀人「抹黑」喎。其實，民主阿婆厚顏無恥，顛倒是非，最恐怖嘅人係佢自己至真。呢嗱，尋日又有市民踩場抗議，要求民主阿婆公開交代事件，睇吓佢呢次仲走得去邊。
古人話，喪亂多妖孽，真係冇講錯。淫賤傳媒同泛民政客狼狽為奸，搞到烏煙瘴氣，七國咁亂，唔怪得香港冇運行喇。有人將呢班牛鬼蛇神稱為「特務黨」，可謂一語中的，佢哋勾結外部勢力，唯恐天下不亂，真係有特殊任務o架。對付特務黨，必須用特殊手段，立法會又好，廉政公署又好，今次必須揸正嚟做，徹查到底，千祈唔好又輕輕放過吖！