政情：有相為證：八十後炒樓王「開舖」撼老鴿

外號白鴿黨嘅民主黨雖然屢爆醜聞，但該黨多名老牌區議員，喺佢哋嘅老巢選區依然係戰無不勝。例如中西區衞城選區嘅鄭麗琼（阿King），由九十年代做到依家，已經連贏咗五次區選，建制派不斷換人挑戰佢，最後都全部輸晒。據聞最新一位挑戰者，係有「八十後炒樓王」之稱、過往現身報章地產版多過政治版嘅自由黨社區幹事吳龍飛，而且仲連辦事處都已經租埋，依家裝修緊，估計好快就會開張。