香港專上學生聯會威脅會喺本月底發動全港大專生大罷課，抗議人大常委會為二○一七年特首普選設下框框，成員以中學生為主嘅學民思潮亦揚言會響應，令人擔心中小學都會有人搞罷課。但據聞擁有最多教師會員嘅香港教育專業人員協會（教協），就對中小學搞罷課有好大保留，擔心會引發家長反彈，質疑啲教師唔盡責藉詞曠課，影響班學生嘅學習進度，反而不利整個民主運動發展。
有教協中人指出，大專生某程度已經係成年人，有權決定自己返唔返學，因此大學罷課可以由教師帶頭發動，亦可以由學生自行發起，但中小學就冇呢支歌仔唱，只能由教師發動罷課唔教書，冇得叫啲學生或者家長自行決定返唔返學。
翻查歷史，香港中小學教師曾經喺七十年代嘅文憑教師風波同「金禧事件」發動罷課，兩者都涉及教育政策及教師生計問題，從未試過為政治議題罷課，難以估計家長嘅接受程度。
而事實上，上次反國教罷課行動，亦係因為得唔到教協支持而不了了之，估計今次好大機會會歷史重演。