政情：中出賀60大壽 搞業界頒獎禮
香港六大商會之一嘅香港中華出入口商會（中出），今年趁踏入六十周年搞搞新意思，先喺灣仔會議展覽中心筵開一百五十席舉行周年晚宴，又會舉辦首屆「進出口企業大獎」同「千人職安保健操」，中出積極籌辦一系列活動顯得雄心萬丈，似乎想進一步提升商會嘅影響力喎。
換屆選舉競爭激烈
除此之外，今年中出領導層換屆選舉亦同步上演。消息指今年選舉競爭激烈，至少有一百五十多人角逐約一百個會董名額，之後再互選三十五名常務會董，下一步就選出新任會長，接替即將功成身退嘅現屆會長莊成鑫。
據悉依家會長大熱人選係中出副會長張學修，當問到接任會長嘅問題，張學修只係拋下兩句「未呀！未呀！」，就未有作進一步解釋。究竟張學修係想名正言順先敢開腔，定係擔心大熱倒灶所以小心翼翼唔敢多講，呢個只有佢本人至知嘞。