政情:家強諗縮數 建制泛民說不

立法會連續兩年審議財政預算案都遇到拉布,議員向當局提出書面問題質詢嘅數目亦有增無減,由前年嘅五千多條增至今年嘅六千八百多條,財經事務及庫務局局長陳家強眼見政府內部同事疑吃不消,早前建議以平均每人提六十五條問題為基準,今後每年財委會書面問題總數「劃線」喺四千五百條內,之不過諮詢立法會多個黨派後,結論係幾乎一致反對限制書面問題數量,睇怕陳家強嘅「劃線」建議如意算盤都係打唔響嘞!

質疑政府迴避監察

針對議員書面質詢問題數目屢創新高,陳家強今年五月去信財委會,提出要為財委會書面問題「劃線」,立法會各黨派最近分別以聯署嘅方式去表達佢哋嘅意見,結果係平時政見南轅北轍嘅建制泛民,今次竟然站在同一陣線同政府說不,原因不外乎係提問本身係議員職責。

泛民方面,曾提問多達六百五十多條問題嘅社福界張國柱聯同工黨黨友回應指,當時全靠議員提出書面質詢同跟進,先至揭發「貪湯」前廉政專員湯顯明豪花公帑宴請、送禮等貪腐醜聞,反質疑當局嘅用意係刻意迴避議會監察。

反建議加開會處理

同樣出名提問多多嘅公民黨陳家洛,佢所屬政黨雖無聯署回應,之不過該黨黨魁梁家傑都認同,唔應該對議員嘅權力有嚴格限制。白鴿黨更將書面質詢問題同憲制層面掛鈎,直言立法會有無可取代嘅監察功能,行政機關有責任向立法機關負責,反建議財委會應該加開會議處理喎。

建制派今次亦罕有無同政府站在同一線,有個別建制議員雖質疑部分議員問題內容無聊,惟工聯會等建制派中堅分子,都同意泛民嘅理據,就係議員嘅權力唔應該被阻礙或削減。

一句到尾,陳家強嘅「劃線」建議似乎喺立法會無乜同道人,如果之後無乜奇招可以扭轉敗局,似乎都可以打定輸數,準備定明年要處理再創新高嘅書面質詢問題數目都得嘞!

第一手消息請下載on.cc東網iPhone/iPad/Android/Windows Phone Apps