中環出更：卿姐：要拿出勇氣嘅係林鄭
政務司司長林鄭月娥本周初於美國《華爾街日報》撰文，呼籲立法會議員拿出政治勇氣實現普選。事隔多日後，民主黨主席劉慧卿（卿姐）就親自上陣同林鄭越洋筆戰，於同一份美國報章撰文反駁林鄭政改言論，直言要拿出政治勇氣嘅人應該係林鄭，要畀港人喺選舉中有真正嘅選擇喎。
就政改越洋筆戰
二○一七年特首普選嘅提名委員會，預料將要參照目前選舉委員會四大界別組成，卿姐於文中表示，港人擔心提名委員會將成為一個讓北京篩走「不愛國、不愛港」或對抗中央參選人嘅工具，同時又對港府唔保證未來普選可達國際標準感到遺憾，強調普選唔應該有任何不合情理嘅限制，而係應該畀選民有真正嘅選擇，佢坦言林鄭為此應該拿出政治勇氣，為港人站起來喎。
其實卿姐以上嘅政改言論多次公開發表，今次越洋同林鄭筆戰，無非都係想當局真正做到「有商有量，實現普選」，究竟林鄭會否意見接受，態度照舊，一切只係佢嘅一念之間。
卓妮