魯迅筆下阿Q「竊書不算偷」，可以當奇談怪論一笑置之，如果盜用人哋版權，印成批書牟取暴利，咁就唔叫「竊」，而係「劫」喇，一定要繩之以法至得。
嗱，海關啱啱偵破一個涉嫌向學校同家長提供盜版教科書嘅集團，喺佢哋旗下書店同倉庫共檢獲七千四百幾本懷疑盜版小學教科書，涉及書目九十幾種，中招定購「賊贓」嘅學校逾三十間，遍布港九新界。海關仲發現，涉案書店為逃避偵查，以七成正版書、三成盜版書嘅方式魚目混珠呃消費者。
放完暑假就開學，呢排正係家長同學生周圍撲書嘅「旺季」，無良奸商以假亂真，正一趁火打劫。唉，冇計啦，教科書一年貴過一年，書商年年加價，而且加幅勁到冇朋友，基層家長本已百上加斤，愁上加愁，如果買番嚟嘅仲係老翻嗰隻，你話係咪冤枉吖。
呢，早前有調查發現，過去十年教科書加幅全部高於或者至少貼近通脹，最高一年達到百分之七添，而同年通脹只有百分之二。同樣離譜嘅係，除咗跟通脹加價，改版亦係教科書加價藉口之一，而且書商郁下就改版，搞到書價完全失控，好似新學年高中教科書咁，每套要四千幾蚊，貴成咁，不法奸商唔心動就假。
盜版年年禁不絕，皆因書價歲歲加。正所謂，賠本生意無人做，殺頭生意有人做，盜版大有錢途，自然會有人鋌而走險，老翻牟利。道理其實好簡單，就好似走私煙咁，煙稅加得愈勁，走私集團嘅利潤空間就愈大，心存僥倖想博懵搵食嘅人就愈多。見利忘義係奸商嘅本性，講來講去，盜版問題愈來愈犀利，港府無所作為，對侵犯知識產權打擊不力，難辭其咎。
講開侵犯知識產權，香港可以算得上「重災區」咯。盜版小學教科書只係冰山一角咋，剽竊他人創作成果情況相當普遍，「文抄公」通街都係，連學術界同傳媒行業亦不能幸免。
呢，就前排之嘛，嗰個一日到黑大談「真普選」，扮晒「正義化身」嘅政治學者，畀人踢爆學術論文涉嫌剽竊，醜聞曝光，個朵即時臭晒。
最離譜係淫賤黎旗下嘅壹淫媒，肆意侵犯東方報業集團知識產權，花樣百出，無奇不有，咁多年嚟累計斷正數十次，淨係向東方賠償或繳付法庭嘅金額合計已經超過一百多萬元，案例仲厚過電話簿，但就恃住有港英餘孽撐腰，睇死當局買佢怕，死性不改，不斷犯案。
講真，如果港產官僚肯依法辦事，揸正嚟做，從嚴處置侵權慣犯，奸商點可能咁肆無忌憚？老翻又點會愈演愈烈，侵權當食生菜吖？