香港回歸十七年來，套一句文藝說話：除了沉淪還是沉淪！除了群魔亂舞，群鴉聒噪，那就是特區政府管治團隊的無能低B——一個消防處竟變成「蠻牛」的胡撞亂闖，搞完東方搞立會，搞完一大輪，發現「一切正常」，於是佢哋「唔正常」咁收隊離去！
你話喇，如此浪費人力物力，不是滿目荒唐，笑中有血是甚麼？睇怕老朽若然舉報酷熱天氣警告下恍似就嚟「火燒自己褲襠」咁，唔知消防處又會派出幾多支煙帽隊如臨大敵飛身撲埋來進行灌救呢？
有人話：簡單的事重複做，你就是專家；重複的事用心做，你就是贏家，然則，消防蠻牛把荒誕的事重複做，把重複的混吉事用心做，那就是佗衰家！是誰令香港特區變作濁流滔天？唔使問黃大仙、車公廟，不必東張西望，就係唔肯用腦嘅消防處高層，連惡意中傷、無厘頭「投訴」都當聖旨咁去執行，其管理層之僵化、腦殘無能，無疑是香港管治大倒退的一個縮影！是「穩中求變，適度有為」的大諷刺！
有個不是笑話的流傳，話說清末以來，中國人被騙被拐去海外做苦力者無數，這些人被稱為「豬仔」，有如今日偷渡客一樣。當時閩粵人的孩子，到了十六歲，為父兄的便特別告誡地吩咐說：「行路時須警惕着，提防別人拐你去賣豬仔！」倘若子弟出外不返，或一時失蹤，第一個判斷必定是「哼！又被人拐去賣豬仔了！」
消防處今後若然大陣仗出動，老朽一定會呼出驚天大感嘆：又係時候出去大搞喇！咁又會搞邊個啊？肯定唔會係壹淫媒、中聯辦、駐港解放軍軍營、美國領事館……老朽屈指一算，撫鬚笑曰：應該係警務處或「黑影」代言人一哥嘅住所！
唉！今時今日嘅香港，根本唔使「佔中」，淨係一個消防處都已經搞死香港！