航空事故接二連三，引起外界極度關注。立法會考慮到議員嘅安危，行政管理委員會原來去年早有先見之明，通過決定凡議員集體出埠外訪公幹時，每班航機不能接載超過一定數量嘅議員乘搭，以避免航空意外令議員全軍覆沒。今年四月立法會嘅上海之行，就係第一次實行呢個規定，將議員分開兩班航班來往上海。
事緣去年立法會環境事務委員會，赴南韓首爾進行職務訪問，其中保險界議員陳健波一向對飛行安全特別留意，更習慣於出發前查看所乘搭航空公司嘅飛行紀錄。不過，佢睇完之後唔係好滿意韓亞航空嘅表現，仲提出好多較具規模嘅大公司，當有過半數高層需要外訪工作時，都會被安排分開乘搭唔同航班，減低佢哋集體遇到意外嘅風險，但佢話當時冇乜人理佢，佢就自己訂咗國泰航空嘅機票分開前往。
其後佢哋去完南韓返港，大家亦開始坐低正視呢個問題，並決定落實通過每班航機不會接載超過三分一議員嘅規定，誰知通過後不久，議員之前乘搭嘅韓亞航空公司隨即在去年七月，有一班由南韓仁川飛往美國三藩市嘅航班發生意外，在降落時墜毀，大家因此更明白分散風險嘅重要性。