政情：新任港大法學院長 冇得潛水？
香港大學法律學院新院長何耀明（Michael）今個月初啱啱由新加坡國立大學過檔，將會做足十二年到六十五歲退休。好多香港人成日「返工等放假」，Michael似乎就冇呢支歌仔唱喇，皆因前院長聲稱做咗十二年都冇放過假，Michael講笑問前院長：「點解當初唔同我講？！」
冇得放假嘅其中一個代價，就係冇得去潛水。話說Michael廿幾年前同班朋友齊齊學潛水，點知就愛上潛水，周不時去沖繩、菲律賓、馬來西亞及印尼潛水。Michael又話自己教開書，唔想放假都教書，所以唔會教人潛水喎。
朋友叫佢咪坐紅Van
Michael來港後對衣食住都算適應，但「行」就似乎要了解多啲，因為有朋友叫佢點都唔好搭俗稱「亡命小巴」嘅紅Van。佢又呻香港討論時政大多用中文，對於佢平時只能問路及講「唔該」等簡單中文嚟講，就未必可以深入了解喇。
