政情：鋪路連任 廢鑊四圍辣
食物及衞生局前局長周一嶽（周一鑊）「翻閹」做平等機會委員會（平機會）主席後就周圍點火頭，唔止話要就具爭議嘅反性傾向歧視立法，仲話要檢討現有嘅四條歧視條例，連內地新移民及個人遊、新界原居民嘅丁屋問題等都要辣埋。做開「廢官」嘅周一鑊點解忽然積極呢？有熟悉情況嘅人士話，周一鑊點着咁多火頭，冇三五七年時間都唔使旨意做到，但佢任期差唔多過咗一半，突然咁落力將四條條例「發水」，係想為自己連任鋪路。
或連累今屆政府
周一鑊去年四月上任已經四出話要就反性傾向歧視立法，有關條例牽涉範疇甚廣，無論喺社會定係宗教界都具有好大嘅爭議，並非一時三刻可以成事。不過，周一鑊一鑊未平一鑊又起，揚言話要就《種族歧視條例》、《性別歧視條例》、《殘疾歧視條例》以及《家庭崗位歧視條例》四條現行條例進行檢討，包括將佢哋合而為一咁話。今個月初，平機會仲就此展開咗為期三個月嘅公眾諮詢添。
先莫講反性傾向歧視立法有幾咁棘手，周一鑊所言嘅檢討四條現行條例都已經牽涉到多個範疇，以《種族歧視條例》為例，話要延伸至無論係唔係香港居民、居港年期幾多、係旅客及移民都要受到相關保障，好大機會會辣到新移民嘅福利政策同個人遊等問題。咁搞法真係分分鐘發水發出禍，最終搞出個大頭佛，不單連累今屆政府，相信下屆政府都唔好過，隨時要執佢啲蘇州屎。
賴死唔走搵着數
周一鑊嘅任期原本只得三年，依家已差唔多過咗一半，大可以好似以前喺政府做「廢官」咁渾渾噩噩過日子，何解突然咁積極，仲要挑起啲連前任主席林煥光都冇掂到嘅爭議性工作呢？熟悉當中情況嘅人就透露，周一鑊大力發水其實只係為咗可以喺任期屆滿之後有藉口話仲未完成工作，繼續喺度賴死唔走，兼且又乘機四圍搵着數咁話。如果周一鑊真係咁盤算，勸佢都係死心，因為佢隨時會被自己辣着嘅火頭搞到火燒身，能否完成今屆任期都成問題呀！