中環出更：「青年眼中立會」 調查結果騎呢
國際青年商會尋日發表一個名為「青年人眼中的立法會」嘅問卷調查，三成二受訪者認為，如果立法會要處理較具爭議嘅議題，例如三堆一爐或新界東北發展，應以「先通過、後審議」嘅方式極速通過撥款，增加議事效率。調查結果咁詭異，連有份撐場嘅議員謝偉俊（Paul）都不得不寸爆份問卷充滿矛盾，話如果立法會真係咁做，咁點解仲要開會喎。
謝偉俊寸爆問卷矛盾
對於有議員在不同委員會發起「拉布」戰，五成四受訪青年反對議會出現有關行為，但有四成四人反對限時辯論；而對於泛民主派議員在特首答問大會上以「掟嘢」同離座方式表示抗議，接近七成受訪者表明反對呢啲行為，但又有過半受訪者認為議員應該用所有可行辦法為市民發聲，包括喺議會上抗議。
阿Paul就話，其實唔少議員都好勤力，但焦點總係被個別幾位「拉布」同「搶鳥籠」嘅議員搶去，令佢有時都覺得好無奈。不過，成份問卷調查啲邏輯亂過亂世佳人，究竟係答問卷嘅後生仔唔知道自己答緊乜吖，定係製作問卷嘅人對立法會嘅運作一無所知呢？
卓妮