俗語話，受人錢財，替人消災，世界上從來冇免費午餐呢樣嘢。所以咯喎，如果有人不斷送錢畀人，而有人就密密收錢，唔使問阿貴，當中必定有蠱惑。
嗱，有淫賤黎之稱嘅壹淫媒主席黎智英被踢爆兩年來向泛民政客秘密捐款四千多萬元，好似打開馬桶蓋咁，醜聞愈揭愈臭。廉政公署、警方、立法會及稅務局連日來接獲大量市民嘅舉報及投訴，其中廉署已率先立案，將會循「公職人員行為失當」罪方向調查，睇怕淫賤黎同泛民政客今次有排震咯。話時話，以前建制派或政府官員稍有行差踏錯，泛民議員必定咬住唔放，郁吓就話要引用特權法調查，今次輪到佢哋自己身有屎，睇吓佢哋又點樣面對先。
三歲細路仔都睇得出，以反中亂港為己任嘅淫賤黎向泛民大灑甘露，絕對唔會冇條件。早排立法會討論壹淫媒所謂被抽廣告嘅事，多位泛民議員以維護新聞自由為名，為淫媒保駕護航，家陣真相大白，原來呢班政客收咗淫賤黎嘅錢，而且從來冇申報利益，淨係呢點已經有問題喇。正如「東方報業民意調查」顯示，三成七受訪者認為廉署應介入調查；三成直指可能觸犯公職人員行為失當罪；兩成五認為若有失當必須嚴懲。
至於立法會討論涉及壹淫媒嘅議題時，泛民議員既冇申報利益又唔避席，三成四受訪者認為涉利益衝突，黑箱作業；三成指議員不自律，有心隱瞞；兩成八直指影響公正性。
當然喇，收錢嘅唔止泛民議員，仲包括前政府高官同神職人員。尤其係有「民主阿婆」之稱嘅前政務司司長陳方安生，今年一月收咗三百萬元黑金，跟住就周圍替淫賤黎乞廣告，由香港乞到去英國，咁唔係利益衝突又係乜吖？唔怪得三成四受訪者認為民主阿婆可能以本身影響力干預政府運作；兩成九直斥造成利益輸送；兩成七指有延後利益之嫌。嗱，群眾眼睛係雪亮嘅，唔到民主阿婆繼續狡辯！
最令人質疑嘅係，淫賤黎嘅政治捐款大多由其親信Mark Simon經手，呢個美國人據講同美國共和黨關係密切，本人又曾經喺美國海軍情報部門工作，身份咁特殊，你話當中冇蠱惑都冇人信喇。難怪民主阿婆同李漢奸頻頻去外國唱衰香港，而淫賤黎又被揭發同美國國防部前官員密會，擺明勾結外部勢力。正如上述民調顯示，三成受訪者認為淫賤黎背後疑涉外國勢力；三成指佢係控制泛民嘅政治黑手；兩成九直斥佢涉反中亂港。
所以話，國之將亡，必有妖孽，香港回歸後烏煙瘴氣，七國咁亂，咪就係因為呢班妖孽作怪囉，睇吓佢哋幾時畀天收喇！