政情：「五腳」齊跛 香港冧硬

行政用人不察

首先講身為行政機關之首嘅特首梁振英（CY），上任兩年來多次用人不察，多名局長及行政會議成員唔係個人醜聞纏身，就係脫離民情，有責不問。其中「翻閹」人稱「廢官」嘅食物及衞生局前局長周一嶽做平機會主席，更加係一大敗筆。多名特首選舉期間鬧到CY狗血淋頭嘅「唐營」要員，依家竟然獲委重要公職同勳章獎賞，認真令人大惑不解。

立法屢遇拉布

梁班子施政不順，政令不行，多少亦同立法會多線拉布拖後腿有關。多名激進議員多次喺議事廳鬥激，掟嘢、掃枱、撒溪錢樣樣齊，多項重要民生措施被積壓。多名泛民議員更屢次被揭漏報利益，甚至疑似收錢發聲，言行處事都持雙重標準，為自己利益多過市民福祉，咁又點有公信力去監察政府嘅施政亂象呢？

司法判決失當

司法機關一直高舉司法獨立光環，早前「一國兩制」白皮書提出法官都要愛國，天經地義，但係就即時觸及法律界神經，集體穿黑衣上街。本港法官不時曲解《基本法》，判處政府敗訴阻撓施政，又成日放生或輕判搞事示威者，凡此種種都遭人話詬。

同樣責任重大嘅，仲有負責港澳事務嘅港澳辦同中聯辦，有指廖暉任港澳辦主任十多年，一直對香港面前問題愛理不理，助長利益集團氣焰，對現時亂局責無旁貸。

「兩辦」懶理亂象

人稱西環嘅中聯辦，無形之手好似無處不在，但實際上卻係搞事、敗事多個做實事，包括把心思放喺親中人士授勳得獎等事宜，曾捲入廈門遠華特大走私案嘅全國僑聯常委姚志勝，疑似因西環祝福而喺今年七一獲頒太平紳士銜頭，更加係震驚中港兩地，連本地左派人士都睇唔過眼。

港澳辦同中聯辦失職嘅另一例子，就係早前國務院新聞辦提出要發表「一國兩制」白皮書，當時港府曾溫馨提示，建議押後至七一後才發表，以免變相為泛民與佔中三子提供彈藥，但港澳辦同中聯辦一方懶理，任由國新辦硬推白皮書，結果令本已散散哋嘅佔中公投同真普選聯盟重新團結，聯手加碼搞亂香港。本來應該好穩陣嘅「五腳櫈」，依家五隻腳都斷晒，香港想唔冧都幾難！