中環出更：論壇偷師政總 設「圍牆」防衝擊
香港社會日趨兩極化、激進化同暴力化，立法會早前就因應反新界東北示威衝擊加強保安，包括無限期將示威區外移。之後又輪到政府總部喺公民廣場加建圍柵，被指有違「門常開」設計原意。連有數十年歷史，一直強調透明開放嘅港台節目《城市論壇》，最近亦抵受唔住暴力示威衝擊，需要向政總「偷師」加建透明膠版「圍牆」，真係社會嘅悲哀！
《城市論壇》最近多次爆發暴力示威衝擊，有示威者手持（金界）刀叫囂，有示威者更喺直播期間跳上講台抗議，現場秩序立立亂，冇搞到節目腰斬都算好彩。港台喺上周起實施多項措施加強保安，包括要求現場觀眾簽署承諾書承諾唔會搞事，又要畀工作人員搜袋，以免有人帶同攻擊性武器進場。
長毛曾與示威者互打
至於耗資五位數字、疑似師承政總嘅膠版「圍牆」，尋日終於趕工製成，首度登場，用作分隔台上嘉賓同台下觀眾，以免「長毛」梁國雄與女示威者互相拍打嘅場面重演。「圍牆」高度僅三呎，但論壇主持謝志峰就預先警告，若有人「跨欄」衝上台示威，即屬阻礙廣播：「唔同你計數猶自可，計數你就麻煩！」多名以前搞過事嘅示威者，更被港台列入「黑名單」禁止內進。連向來聲稱崇尚自由民主嘅港台都咁做，行政署不妨「反抄橋」喺政總實施。
卓妮