中環出更：林鄭道歉 都要假手於人
特首梁振英月初出席立法會答問大會，遇上黃毓民投擲文件同水杯，泛民主派亦舉牌離位抗議。政務司司長林鄭月娥事後循例去信立法會主席曾鈺成，點名批評毓民、陳偉業、陳志全及范國威（Gary）四位議員唔遵守議會秩序，又向官員投擲雜物，要求曾鈺成採取措施保障出席立法會會議嘅官員安全。
不過，Gary就認為自己當時只係離座抗議，並無向官員掟嘢，認為林鄭嘅講法與事實不符，於是佢去信林鄭「反抗議」，但喺一個星期後只係收到行政署署長蔡潔如嘅回信，蔡代表林鄭致歉。
范國威被當「掟嘢一族」
對於林鄭道歉都要假手於人，Gary當然唔會收貨啦，於是趁住泛民主派前日同林鄭、政制及內地事務局局長譚志源會面討論政改時，當面質問林鄭點解會將佢當成「掟嘢一族」，又要求林鄭當面向佢道歉。最後林鄭亦有向佢講番聲「唔好意思」，終於可以還Gary一個清白。
講開林鄭，據聞佢下手尋日逐個打電話畀班泛民議員，問佢哋邊個有回鄉證、邊個冇，估計係為咗安排泛民到內地同中央官員傾政改做準備，但打電話嘅人就冇透露幾時起程同見邊個。
卓妮