中環出更：名人寫食譜 回味香港
昔日嘅香江菜餚，特別惹人懷念。精於廚藝的中電企業發展總裁莊偉茵夫婿黃楚權（Adam），最近將佢媽咪於六十至八十年代經常煲畀家人食用的愛心湯水整理出書，咁啱時裝設計師鄧達智（William）亦聯同佢家姐鄧桂香合著一本講述元朗地道飲食嘅書籍。佢哋寫書目的都係為咗記載上個世紀嘅香港飲食滋味，以免老味道失傳，講起昔日味道，回味無窮。
William話，元朗除咗馳名嘅烏頭魚同絲苗米，亦遍布好多野果野菜，記得細個時唔使問父母攞錢買零食，口痕想食嘢時，隨手摘野果就可以醫肚。不過，隨着新界村莊逐步城市化，呢啲咁令人回味嘅元朗土產就買少見少喇！
「冬蟲夏草以前唔貴」
Adam就話，由於時代嘅變遷，煲湯材料亦今時唔同往日，好似冬蟲夏草以前售價唔貴，所以好多人都鍾意用來煲湯。以前香港人餐桌上常見的湯料例如胖大海、天花粉，現時亦成罕見之物。雖然湯水用料唔同晒，但係湯水所蘊含嘅人情味就始終如一。Adam話，多年以來佢媽咪都用愛心炮製靚湯滋潤家人，惟近年來老人家健康狀況唔好，故此佢就負起為家人提供湯水嘅重任，亦希望藉住呢本湯譜，作為對媽咪嘅一份敬意。
「昔日常以海產入饌」
另外，專寫食譜嘅陳紀臨與方曉嵐夫婦又有新書出爐，陳紀臨話，昔日港人常以海產入饌，所以香港菜同愛用河鮮嘅廣東菜其實有區別，但由於好多海產無法人工繁殖，加上過度撈捕，老一輩熟悉嘅食材已從餐桌上絕迹，例如舊時街市常見嘅池魚，對好多後生仔來講，真係聽都未聽過。
卓妮