抵食夾大件一向係屋邨商場食肆嘅生招牌，出品平靚正，生意唔憂做。不過，家陣再冇呢支歌仔唱咯，皆因領匯呢個大業主為富不仁，下下藉「優化」之名搏命加租，搞到平民食肆難以為繼，屋邨居民無啖好食，焗住要絕地反擊。
嗱，大埔大元邨美食廣場關注組發起「餓爆領匯」行動，喺區內多個領匯旗下商場，呼籲市民唔好幫襯商場內嘅大型連鎖式食肆，以表達居民對商場改裝後，街坊食肆被逼走嘅不滿，直指領匯扼殺佢哋嘅生存空間。關注組仲計劃日後發起每月針對一間連鎖式食肆嘅罷食行動添。
唉，又唔怪得居民同商戶搞到罷食咁激嘅，領匯一直以來漠視屋邨居民需求，美其名曰「優化」商場，其實係優化荷包。佢哋大幅加租，逼走平民食肆，引入高檔餐廳，自己賺到盆滿缽滿，小商戶就一殼眼淚。最諷刺係，領匯早排搞乜鬼「尋味時光」，結果咪變成市民口中嘅「尋你老味」，自取其辱囉。
話時話，領匯玩殘食肆一早唔係新聞。屯門友愛商場○八年被領匯接管之後，即時大規模翻新，舊貌換新顏本來係好事，弊在領匯利字當頭，懶理商戶生計同居民需要，有理無理係咁加租。好似一間留守友愛邨近三十年嘅餐廳咁，租金由○八年嘅每月二萬八千元，加到依家五萬幾元，最近仲要畀領匯迫遷，你話係咪離譜吖！你話係咪逼上梁山吖！
係人都知，公屋同居屋商場嘅服務對象主要係基層市民，平靚正先至受歡迎，領匯接手後，罔顧社會責任，一味掛住掠水，多次以翻新商場為名大幅加租，或者要求舊租戶同新租戶一齊投標，變相將舊租戶趕絕。正所謂，羊毛出在羊身上，租金大增，最終轉嫁畀顧客，令基層市民百上加斤。
除此之外，因為商場變得單一化，居民無得選擇，生活好唔方便。家陣領匯商場啲店舖幾乎千篇一律係連鎖店，唔係賣化妝品，就係賣珠寶首飾，唔係賣電器，就係賣中西成藥，擺到明招徠遊客，完全冇晒香港嘅本地特色。
其實話到尾，領匯之所以咁肆無忌憚，為所欲為，完全係港府當年政策失誤，多年來又監管不足造成嘅惡果。解鈴還須繫鈴人，幾年前油魔肆虐無王管，運輸業飽受貴油價煎熬，無奈之下發起「餓死油魔」行動，呢次公屋食肆「餓爆領匯」，同樣係官逼民反嘅咋。咪話功夫茶唔提醒，唔該港府快快諗計，將呢隻怪獸收入籠，如果再縱容放任「群魔亂舞」，市民隨時發起「餓爆庸官」行動o架。